冬至, 係大多數人來講只係一種傳統節日, 但由二年前嘅今天開始, 這天就成了我家的紀念日. 二年前的今天, 你由一個陌生人抱走之後, 我家也再沒有你的影子出現, 換來的只有一個細小瓷樽, 裡面存放着你的一切.
時間過得真係好快好快, 你離開我家去了彩虹橋之後, 唔知你現時生活如何呢? 有無地方住呢? 食咗飯未呀? 而家天氣好凍, 你有無凍襯呀? 以前你好鍾意我抱住你瞓, 而家無人抱, 你瞓唔瞓得好呀? 有無識到新朋友呢? 以前一向高傲嘅你, 對任何同類都不願理睬 (除了靚女呢!) 希望你係彩虹橋可以識到新朋友啦! 其實到現在, 每晩我都會對住你張相, 同你講同一樣嘅說話, 如果比你婆婆知道, 佢一定以為我痴咗線呢!
好希望你可以知道, 我到現在都好掛住你, 好想知到你嘅近況, 好想再同你說話,好想再嗅到你嘅味道! 好想再望到你;當你望見唔滿意嘅食物時 E牙個樣. 好想再望到你;當你做錯事時眼神出現無辜嘅樣. 好想再抱住你同你玩, 好想, 好想, 好多好多好想……最想的就係你從來沒有離我哋! 雖然呢個係奢望, 但係我哋也會永遠永遠咁愛你同掛住你! 
